2020.05.09
මාධ්‍ය නිවේදනයයි
විල්ලු පරිසර පද්ධතීන්ට අයත් වැලිකන්ද දිවුලාන විල විල්ලුවේ සිදුවෙමින් පවතින විනාශය වලක්වා ගැනීමට වහා පියවර ගන්න

ජල ගැලුම් නිම්න ජාතික වනෝද්‍යානයට අයත් අක්කර 2800 ක් පමණ ප්‍රමාණයකින් යුත් වැලිකන්ද දිවුලාන විල විල්ලුව යම් පිරිසක් විසින් මේ වන විට විනාශ කරමින් පවතී. කොරෝනා ඇඳිරි නීතියට මුවා වී මෙම විනාශය සිදුකරන බව පරිසර යුක්ති කේන්ද්‍රයට වාර්තා වේ. වන ජීවී සංරක්ෂණ දෙපාර්තමේන්තුවේ, පොළොන්නරුව වන ජීවී කලාපයට අයත් වන මෙම ජල ගැලුම් නිම්න වනෝද්‍යානය තුළ ප්‍රදේශයේ දේශපාලන බලවතෙකුගේ මැදිහත් වීම ඇතිව සිදු වෙමින් පවතින බවද පවසයි. මහවැලි ගඟ ආශ්‍රීතව මෙවැනි විල්ලු වැඩි වශයෙන් නිර්මාණය වී ඇති අතර මෙම පරිසර පද්ධතීන්, වන අලි ඇතුලු, වන ජීවීන්ගේ වාසයට තෝතැන්නක් වී ඇති බව ඒ පිළිබඳව අවබෝධයක් ඇති ඕනෑම අයෙක් ඉතා හොඳින් දන්නා කරුණකි.

මෙම විනාශයට ලක්වෙමින් පවතින දිවුලාන විල විල්ලුවද වන අලි ගැවසෙන විල්ලුවක් වන අතර යම් යම් පුද්ගලයන් විසින් කුඹුරු වගාව සඳහා අනවසරයෙන් අත්පත් කර ගෙන ඇත. ඉදිරි දේශපාලන උණුසුම හමුවේ මෙම අත්පත් කර ගැනීම් වැඩි වෙමින් පවතින අතර අප දන්වා සිටින්නේ මෙම පාරිසරික පද්ධතීන් තුළ පවත්නා ස්වභාවික ක්‍රියාවලීන් පිළිබඳව හරි අවබෝධයක් නැත්තවුන් විසින් මෙම වැනසීම සිදුකරන බවයි. ඔබ කවුරුත් දන්නා පරිදි පසුගිය වසරේදී මෙම දිවුලාන විල්ලුවේ පුදුර් ප්‍රදේශයේදී මඬේ එරීමෙන් මිය ගිය වන අලි පස් දෙනාගේ සිද්ධියටද මුල් වී ඇත්තේ වන අලින් සැරිසරන මාර්ගයන් එම සතුන්ට ඇවැසි පරිදි පරිහරණය කිරීමට ඉඩ නොදී බිය වැද්දීම හේතුවෙන් නුපුරුදු පෙදෙසකින් විල්ලුවට බැසීම නිසා බව ප්‍රදේශවාසීන් පවසා සිටී.

වන ජීවී නිලධාරීන් විසින් අත්අඩංගුවට ගත් අනවසර වගාකරුවන් හා ඔවුන්ගේ ට්‍රැක්ටර් රථ මුදාහරින ලෙස ප්‍රදේශයේ දේශපාලකයෙකුගේ උවමනාව මත ඉහළම රාජ්‍ය නිලධාරියෙකුගෙන් සිදුවන බලපෑම හමුවේ නීතිය හරිහැටි ක්‍රියාත්මක කිරීම වලකමින් සිටී. පරිසර යුක්ති කේන්ද්‍රය මේ පිළිබඳව බලවත් අප්‍රසාදය පළ කර සිටී. මෙසේ නීතිය නැවීමට තැත් කරමින් සිටින්නේ සමහර දේශපාලකයින් තම අභිමතය පරිදි බලය පතුරුවන්නට කටයුතු කිරීම හේතුවෙනි. වන ජීවී සංරක්ෂණ දෙපාර්තමේන්තුවේ සේවාවන් අත්‍යවශ්‍ය සේවයක් බවට පත්කරන ලෙස මෙම කොරෝනා වෛරස් තත්ත්වය හමුවේදී ගරු ජනාධිපතිතුමන්ගෙන් ඉල්ලා සිටියේද මෙවැනි හේතුූන් නිසාමය.

දැනගන්නට ලැබී ඇති ආකාරයට 11 වන සඳුදා දින අවශ්‍ය නීතිමය කටයුතු වෙනුවෙන් වැරදිකරුවන් උසාවියට ඉදිරිපත් කිරීමට නියමිතව ඇත. නීතියට පටහැනිව සිදුවන මෙම ක්‍රියාව නවත්වන තුරු පරිසර යුක්ති කේන්ද්‍රය අවදියෙන් සිටී.

■ මේ හා සම්බන්ධයෙන් වැඩි විස්තර අවශ්‍යනම් කරුණාකර පරිසර යුක්ති කේන්ද්‍රයේ ප්‍රතිපත්ති හා දැනුවත් කිරීමේ නිලධාරී , ජනක විතානගේ (0714338844) මහතා අමතන්න.

මාධ්‍ය අංශය,
පරිසර යුක්ති කේන්ද්‍රය